Uwashinze Umuryango Imbuto akaba n’Umuyobozi w’Ikirenga

Nyakubahwa Madamu Jeannette Kagame akaba n’Umuyobozi Mukuru w’Ikirenga w’Umuryango Imbuto na Unity Club Intwararumuri, arangwa n’umurava, umutima w’ubugwaneza, n’ishyaka mu guharanira kuzana impinduka mu buzima bw’imiryango nyarwanda yugarijwe n’ubukene n’ibindi bibazo by’ubuzima. Nyakubahwa Madamu Jeannette Kagame mu bikorwa bye bya buri munsi yita cyane ku bapfakazi, abana bagizwe imfubyi na Jenoside yakorewe Abatutsi ndetse n’imiryango yugarijwe n’ubukene.

Abinyujije mu muryango Imbuto Foundation, Nyakubahwa Madamu Jeannette Kagame yatangije imishinga itandukanye igamije guhangana n’ibibazo bijyanye n’uburezi, ubuzima, ubukungu n’imibereho ya buri munsi muri rusange, byari byugarije umuryango nyarwanda.

Nyakubahwa Madamu Jeannette Kagame ni umwe mu bagize inama nkuru z’ abafata ibyemezo mu miryango mpuzamahanga itandukanye. Imwe muri iyo miryango ni Friends of Global Fund Africa, Global HIV Vaccine Enterprise hamwe n’ihuriro mpuzamahanga ry’abagore rirwanya ubwandu bwa virusi itera SIDA.

Nyakubahwa Madamu Jeannette Kagame kandi ni komiseri mu muryango w’abibumbye ishami rirwanya SIDA ndetse no mu muryango LANCET.