Baho Neza ni umushinga uteza imbere ubuzima watangijwe muri 2018 ku bufatanye na Minisiteri y’ubuzima ni abandi bafatanya bikorwa mu bijyanye ni ubuzima.
Uyu mushinga ufite intego yo kongera imbaraga mu bijyanye no kuboneza urubyaro ku kigero cya 25% mu myaka itatu iri imbere wongera ubushobozi bwa buri muturage bwo kubasha kubona serivisi z’ubuzima.
Ibi bizakorwa hafashwa kongerera ubushobozi ibigo nderabuzima, kugira bibashe kugira serivisi z’ubuzima zose zo kwirinda ndetse ni ubuvuzi bw’ibanze kuri buri rwego rw’akagali. Izo serivisi harimo uburyo bwo kuboneza urubyaro bwitwa "Long Acting Reversible Contraception (LARC)", ubufasha buhabwa abakuyemo inda bwitwa "Post abortion care", ndetse ni ubufasha bwo gukuramo inda mu gihe byemejwe.
Binyuze muri uyu mushinga
Abarenze 749 bahawe uburyo bwo kuboneza urubyaro bw’ igihe kirekire bwitwa "Long Acting Reversible Contraception (LARC)"
Abajyanama b’ubuzima 14,673 bahuguwe ku bijyanye ni uburyo umubyeyi yitabwaho mu gihe atwite, igihe amaze kubyara, ndetse ni igihe inda yavuyemo.
Urubyiruko rugera kuri 533 na "Opinion leaders" bagejejweho inyigisho ku bijyanye ni ubuzima bw’imyororokere, ndetse no kwita ku bana bakiri bato, kwirinda inda zitateganyijwe mu bangavu, ndetse ni uburyo ingimbi ni abangavu bagomba kubana ni ababyeyi
Umushinga ugamije kurandura ubwandu bwa virusi itera SIDA hagati y’umubyeyi n’umwana
ni gahunda yatangijwe muri 2001 na Nyakubahwa Madamu Jeannette Kagame.
Iyi gahunda yita ku muryango, itanga ubufasha ku miryango ibana n’ubwandu bwa virusi itera SIDA cyangwa yagezweho n’ingaruka za virusi itera SIDA.
Iyi gahunda yashyizweho nk’igisubizo cyo guhashya icyorezo cya SIDA cyari gikomeje gufata indi ntera muri sosiyete nyarwanda.
Muri gahunda y’ibigenerwa umuryango harimo kurandura ubwandu hagati y’umubyeyi n’umwana atwite (EMTCT), kuboneza urubyaro, kwita ku ndyo yuzuye, ubujyanama ku buzima bwo mu mutwe, ku bamaze kugerwaho n’ubwandu cyangwa n’ingaruka z’ubwandu bwa virusi itera SIDA, n’izindi serivisi z’ubuzima.
Iyi gahunda ikorera mu bigo nderabuzima 32 mu turere 6 turimo Bugesera, Huye, Gatsibo, Musanze, Rubavu na Ngororero’’.
Binyuze muri uyu mushinga:
• Urubyiruko 73,700 rwitabiriye serivisi zo kwipimisha ku bushake virusi itera SIDA.
• Abagore 26,647 babashije guhabwa serivisi zibafasha kurinda ubwandu bwa virusi itera SIDA abana babyara.
Gahunda y’Ubuzima bw’imyororokere n’uburenganzira ku bangavu n’ingimbi yatangiye muri 2010 yimakaza kugira imyitwarire myiza mu rubyiruko ruri hagati y’imyaka 10 na 24 baba bari mu mashuri cyangwa hanze yayo.
Iyo gahunda ihuriwemo n’ibigo nderabuzima, club zo ku mashuri n’imiryango y’urubyiruko kugira ngo batange serivisi zikenerwa n’urubyiruko binyuze ku bafashamyumvire babitojwe.
Iyi gahunda kandi yifashishwa mu bukangurambaga bujyanye no kwirinda agakoko gatera SIDA mu rubyiruko ndetse no kugabanya umubare w’abakobwa batwara inda zitateguwe bakiri bato.
Binyuze muri uyu mushinga:
• Urubyiruko 293, 652 rwabashije kubone serivisi zirimo kwipimisha agakoko gatera Sida, kwipimisha indwara zandurira mu myanya ndagagitsina, kwisiramura kubasore, kwigishwa uburyo bwo kuboneza urabyaro, no gushishikariza ababyeyi kwisuzumisha mbere, igihe batwite na nyuma yo kubyara.
• Muri iyi gahunda, dufite amatsinda 107 ahuza urubyiruko ruri mu mashuri, n’andi matsinda 156 ahuza urubyiruko rutari mu mashuri.
Iyi gahunda ni icyiciro cya gatatu cy’umushinga witwa ‘Mountain Movers’ watangijwe muri 2011.
Muri 2015, nibwo icyiciro cya kabiri cya gahunda igamije kugabanya ubwandu bw’agakoko gatera SIDA mu rubyiruko, ruri hagati y’imyaka 15 na 24 ndetse no kubakangurira kwirinda indwara y’igituntu - (Mountain Movers II) cyatangijwe.
Ababyeyi ndetse n’abana bashyizwe mu matsinda agamije kubahugura no kubafasha kugirana ibiganiro byubaka ku bijyanye n’ubuzima bw’imyororokere, imihindagurikire y’umubiri, ibijyanye n’imibonano mpuzabitsina, kwirinda no kurwanya agakoko gatera SIDA ndetse n’inda ziterwa abangavu.
Iyi gahunda ikora ubukangurambaga binyuze mu gutanga amakuru ajyanye n’icyorezo cya SIDA ndetse n’igituntu muri za serivisi zitangirwa ku bigo nderabuzima.
Binyuze muri uyu mushinga:
• Urubyiruko rugera ku 17,862 ruri hagati y’imyaka 15 na 24 rwahuguwe ku bijyanye n’indwara zandurira mu mibonano mpuzabitsina idakigingiye no kurwanya agakoko gatera Sida.
• Urubyiruko rw’abakobwa n’abahungu rugera ku 54,000 rwahawe amasomo atandukanye ajyanye no kwirinda SIDA.